السبت، 6 نوفمبر 2010

البحث عن حاجة تسد النفس

بما ان البحث عن المتعة هو السبب الأساسى لمشكلة المشاكل الى بعانى منها وهى الوزن الزايد,
فالبحث عن حاجة تسد النفس والعثور عليها هو الحل الوحيد للمشكلة.
حاولت كتير ادور على حاجة تسد نفسى واتبعت كل الوصفات الى سمعتها.
بدءت بخل التفاح طبعا كل التخان عارفين ريحته وطعمه وعارفين المعاناة الفظيعة فى شرب معلقة خل تفاح على نص كوب ماء على الريق وقبل الأكل لكن مافيش فايدة لا نفسى انسدت ولا خسيت,بالرغم من ان ناس كتيييييييييير بتشكر فيه وبتحكى على نتايجه الجميلة فى التخسيس.
وانا فى تالتة ثانوى تابعت مع دكتورة رجيم وكتبت لى فى الرجيم واحدة جريب فروت على الريق كل يوم ,بس المشكلة ان كل حاجة بتسد النفس فعلا طعمها يسد النفس فما كنتش بقدر اكلها, ولو جيت على نفسى واكلتها بكون عايزة اكل اى حاجة بعدها عشان اتخلص من طعمها,فبدل ما تسد نفسى كانت بتفتحها فقلت الطيب احسن وبطلت اكل الجريب فروت.
وفى مشوار البحث عن حاجة تسد النفس جربت الإبر الصينية بس اعتقد ان حكاية انها بتسد النفس ده مالوش اى اساس من الصحة ,لأننى خسيت آه بس لأنى ماكنتش باكل, وما كنتش باكل آه لكن كنت جعانة ومش باكل غصب عنى.
وفى فترة من فترات حياتى المليانة بالإحباط والإحساس بالفشل جربت حبوب الريداكتيل ,ودى للى ما يعرفهاش حبوب غالية جدا وكل الى جربها اكد انها بتسد النفس,بس على مين ولا الهوا, ولا كأنى باخد اى حاجة.وعلى فكرة الحبوب دى اتمنعت من السوق دلوقتى لأنهم وجدوا انها ضارة جدا , عشان لو حد فيكم بيفكر يجربها ولا حاجة.
بما ان كل دكاترة الرجيم وكل الناس عموما تقولك ابدئى بالسلطة ,طبق كبيييييييييييير من السلطة,عشان تملى معدتك وتاكلى بعد كده كمية قليلة من باقى الأكل ,بدءت بالسلطة ,طبق كبير من السلطة, بس مش عارفة ليه كل ما اكل السلطة احس انى جعانة زيادة بدل ما اشبع,زى ما تكون معدتى بتعند معايا , او اعتقد انها مش معدتى وانه عقلى الباطن بيثبت لى انه مهما حاولت اتحكم فيه فهو المتحكم والكلمة الأخيرة له, وبالتالى دائما ما يفشل طبق السلطة فى سد نفسى .
اخر حاجة جربتها عشان احاول اسد نفسى كوب زبادى منزوع الدسم وعليه معلقتين ردة وملعقة شمر مطحون باخده 3 مرات قبل الاكل واشرب بعده مية عشان الردة تنفش وتملا المعدة .
لحد دلوقتى الموضوع قيد التجربة بس اعتقد انه ممكن يكون ناجح ولو بنسبة بسيطة فى ملأ الفراغ
وما زال البحث مستمر عن حاجة تسد نفسى وتخلينى ابطل اكل من غير الشعور المريع بالجوع,
واول ما الاقى اكيد هقولكم على طوووووووووووووول.

هناك 9 تعليقات:

  1. انا باخد معلقه لبان دكر وانقعها 3أو4ساعات فى مج ميه مغليه واشربها قبل الفطار وقبل الغدا وبعد العشا
    وسدت نفسي اوى جربى وربنا معانا

    ردحذف
    الردود
    1. بس اكيد طعمها مر اوي صح ؟

      حذف
  2. يبقى انتى زى حالاتى بتاكلى عشان تشغلى الفراغ العاطفى فى حياتك
    لما كنت مصالحة نقسى خسيت 22 كيلو بس نتيجة لاحباطات الجواز و مسئوليات الولادة تخنت 28 كيلو بس الحمد لله قعدت مع نفسى قعدة كده و وعدتها انى ادلعها و ان شاء الله هاقولك على النتيجة
    مامت فريدة

    ردحذف
  3. طبعا كتير باكل عشان الى الفراغ اتغلب على الملل والزهق وساعات باكل عشان مش عارفة هعمل ايه لو ما اكلتش وساعات باكل بس عشان جعانة
    اختلفت الاسباب والنتيجة واحدة

    ردحذف
  4. انا بشرب قرفة وجنزبيل وكمون وعليهم مية مغلية ثلاث مرات فى اليوم قبل الاكل بنصف ساعة بجانب الشاى الاخضر ثلاث مرات

    ردحذف
  5. عايزه حاجه تسد النفس وتخسس فى نفس الوقت بنتى عمرها ست سنوات ووزنها 50 كيلو

    ردحذف
  6. بنتك لسة طفلة يعنى ما ينفعش تديها اى حاجة من نفسك او تعملى لها اى رجيم من اللى احنا بنعمله او بناخده من على النت ، لازم رجيم من دكتور ويكون رجيم للأطفال عشان ما يأثر على نموها أو ذكائها . وبعدين بنتك عندها ميزة كويسة جدا ، انها لسة طفلة وأكتر حاجة هتساعدها هى الحرة واللعب مش الرياضة بمعناها اللى احنا نعرفه وبنمارسه ، لكن مجرد لعبها مع اصحابها فى الشارع او فى الجنينة او فى النادى ولعبها طنطيتها هيساعده كتيييييير . أكبر عدو لها القعدة والكسل والخمول . أنا عارفة ان ظروفنا بتحكم علينا وعلى أولادنا بالقعدة فى البيت وقلة الحركة لكن ده غلط كبير ، حاولى بأى طريقة تخليها تلعب وتتحرك بس من غير ما تقولى لها لازم تتحركى او تلعبى عشان تخسى ، خليها تلعب وهى مبسوطة مش مقهورة . والحقيها لأنها لو فضلت كده كمان كام سنة فى الغالب هتفضل كده طول عمرها .ربنا يخليها لك ويبارك لك فيها .

    ردحذف
  7. اناجربت الكمون .واليمون.وااجنزبيل.والقرفة.والنعناع.والشاى اﻻخضر منكل منهم معلقة صغيرة على كوب ماء مغلى قبل كل وجبة واخدت معاهم اورليستات حبوب تخسيس .ونزلت حوالى.15كيلو فى شهرين

    ردحذف
  8. و الله انتى عسل كانك بتتكلمى عنى بالظبط ربنا يعينا و يكرمنا بالخسسان من عنده و احنا فى تمام الصحة و العافية ان شاء الله
    شيماء زكى

    ردحذف

لا تنسى ابدا ذكر الله

sultan.org free islamic books

Copyright Text

Sponsor

اسهل و اوفر و اسرع طريقة لاشهار موقعك
Search Engine Submission - AddMe hitstatus