انا وهو وزميله

زوجى له واحد زميله كان ماشاء الله وزنه 148 كيلوا
وفضل حوالى سنتين ماشافهوش
ومن كام يوم لقى واحد بيسلم عليه وبيكلمه وهو مش عارف ده مين
بعد مامشى بيسألواحد زميله كان واقف معاه وبيقوله هوده مين؟
قاله مش عارفه ازاى ده فلان؟
طبعا زوجى ما صدقش قاله ازاى ده فلان انت متأكد
هو ازاى بقى كده
زميله الى ماعرفوش ده كان وزنه زى ما قلت لكم 148 ودلوقتى بقى وزنه 70 كيلوا
وشكله اتغير 100% لدرجة ان زوجى ماعرفوش فعلا
ولأن زوجى مشغول قوى بالرجيم ونزول الوزن طبعا بسببى ونفسه يلاقى طريقة عشان اخس انا كمان
ولأن زميله ده ما شاء الله كان وشه كويس ونضر فكان زوجى متاكد انه ماعندوش السكر ولا أى مرض يسبب فقدان الوزن
طبعا انا اول جوزى ما قالى قعدت استعبط واقوله اكيد عمل عملية فى المعدة وتوهت فى الكلام
جوزى طبعا سأل واح قريب من زميله ده
قاله ايه بقى زميله خس كده بالرجيم والمشى وحتى ماكانش بيتابع مع دكتور
اول 6 شهور كان بيفطر الصبح زبادى زينزل شغله
وهو طبيعة شغله ممكن يفضل فيه من الصبح لحد بالليل
وطول النهار مديها قهوة وسجاير
ويروح يتعشى سلطة ولحمة او فراخ
يعنى مانع الدهون والنشويات والسكريات نهائى
وفى ظرف سنة او اكتر شوية كان خس 78 كيلوا
طبعا انا كنت فى نص هدومى وبقول يا ارض انشقى وابلعينى
وحسيت ان جوزى مش طايقنى
وقعدت اخرف بقى فى الكلام واقول لجوزى ماهو قعاده فى الشغل طول النهار ده هو نص الموضوع وهو الى ساعده
والقهوة والسجاير بتخسس
بس يعنى يضيع صحته عشان يخس
واتحجج بقى واقوله عارف انا لو ماكنتش برضع كنت عملت زيه
قال يعنى انا برضع من يوم ماتجوزنى
وانا صحيح الدكتورة قايلة انى اخس كيلوا فى الاسبوع بس انا لو استمريت هخس عشرين كيلوا فى 5 شهور
مش قليلين برده
وماكنتش عارفة انا بقول ايه
ولا احساسى الرهيب بالفشل مااقولكمش عليه
ودلوقتى طبعا بقى فى سبب جديد ينضم لقائمة الاسباب الطويلة الى بتحتم عليا اخس وبسرعة
والى بتدى لجوزى سبب يحس بفشلى ويحسسنى بيه.

تعليقات

  1. زميله الى ماعرفوش ده كان وزنه زى ما قلت لكم 148 ودلوقتى بقى وزنه 70 كيلوا
    وشكله اتغير 100% لدرجة ان زوجى ماعرفوش فعلا
    بسم الله ماشاء الله خس 78 كج
    انا بقول يارب اخس نصهم ولاربعهم
    ماشاء الله
    بس اكيد في ارادة

    ردحذف
  2. اكيد الارادة مهمة جدا
    بس انا شايفة ان فى ظروف بتساعد على تقوية اللإرادة وفى ظروف تانية بتضعفها
    يعنى زميل زوجى ده كان بيقضى يومه كله تقريبا فى الشغل بعيد عن كل مغريات الأكل وده قوى ارادته وسهل الموضوع عليه شوية لأنه بيكون مشغول عن الجوع وما فيش وقت للأكل وممكن انه يفضل طول اليوم على أكل بسيط جدا من غير ما يجاهد نفسه كتير,
    لكن احنا مثلا ,واقصد هنا الستات وربات المنزل بالذات , طول اليوم قاعدين من غير حركة تقريبا ووقتنا معظمه بنقضيه مع الأكل يا إما بنطبخ يا إما بنأكل الأولاد ياإما بناكل
    ولما بنجوع بيكون قدامنا الأكل متوفر من كل ما لذ وطاب
    وده الى بيصعب الموضوع جدا جدا علينا وبيخلى ارادتنا تضعف
    ده غير الملل الى بيخلينا ناكل عشان نكسره ونتغلب عليه.

    ردحذف

إرسال تعليق

المشاركات الشائعة من هذه المدونة

نصائح قبل البدء في الرجيم الكيميائى للدكتور أسامة حمدى

خلاصة كتاب حمية الثلاث ساعات لجورج كروز

البحث عن حاجة تسد النفس