الأربعاء، 16 فبراير 2011

غداء مشبع بأقل السعرات الحرارية

النهاردة هقولكم على بعض الطرق البسيطة لطبخ غداء شهى وصحى بأقل السعرات الحرارية, وزى ما قلت قبل كده دى مجرد نصائح لتقليل السعرات الحرارية مش رجيم ,احنا بنحاول مانحسش بالجوع او الحرمان وفى نفس الوقت مايزيدش وزننا ويمكن نخس شوية.
نبتدى بأهم حاجة واكتر حاجة بتزود الوزن فى الغدا
 1-(الأرز) او (العيش)كما يسميه اخواننا فى الخليج, الأرز ممكن ننقعه شوية قبل الطبخ وبدل ما نحط كمية مياه تسويه بس بنسلقه فى مياه كثيرة ولما يستوى نصفيه ونسيبه على نار هادية دقيقتين تلاتة وطبعا مافيش زيت ولا سمنة ولا زبدة وبكده نكون تخلصنا من كمية كبيرة من النشا الموجودة فى الأرز ,  وعلى فكرة الأرز البسمتى المستخدم فى الخليج بيكون فيه سعرات حرارية اقل بكتير من الأرز المصرى وبتطبيق طريقة السلق عليه بنقلل سعراته اكتر واكتر.
2-الخضروات: طبعا احنا فى مصر لازم نعمل تسبيكة محترمة لكل انواع الخضار, وطبعا التسبيكة بتحتوى على كمية محترمة من الزيت او السمن, وده غير ان التسبيكة لما بنسيبها تتسبك على النار بيقولوا انها بتنتج مادة ضارة بالصحة, وكلنا بيننا وبين الخضار النى فى نى مشاعر مش كويسة ابدا, لكن انا , واعوذ بالله من قولت انا ,بطبخ الخضار بطريقة سهلة وجميلة وصحية ولذيذة فى نفس الوقت, بجيب البصل والطماطم والثوم واضربهم فى الخلاط واحطهم على النار مع الشوربة ,الخفيفة الى من غير دهون ظاهرة, الى هطبخ بيها الخضار واسيبهم يستوا شوية وبعدين ازود اى خضار انا عايزاه وبيطلع جميل جدا وبينفع مع كل انواع الخضار والبقول زى الفاصوليا الناشفة واللوبيا.
3- المحاشى: اولا نتكلم عن صلصة المحشى, بنعملها زى تسبيكة الخضار بالضبط بس بنحط شوربة قليلة بحيث انها تنشف على ما الطماطم والبصل يستوا. ثانيا الحشو الى هو الأرز والشبت والكسبرة , بنزود الخضرة على أد ما نقدر ونحاول نستخدم ارز بسمتى لو موجود ولو مش موجود بنستخدم الأرز العادى , وبننقعه فترة كافية عشان نتخلص من بعض النشا , ونحاول نخلى كمية الأرز قليلة والخضرة كتيرة زى ما قولنا, ونحشى ونسوى عادى جدا وبيطلع احلى محشى .وعلى فكرة الممبار ممكن نعمله بنفس الحشوة وبيبقى طعمه لذيذ جدا .
4- الفتة: طبعا فى ناس بيعشقوا الفتة وخصوصا فى المواسم والأعياد. الفتة ممكن نعملها دايت او صحية بمنتهى السهولة , بنستخدم الخبز الأسمر بدل الأبيض او الرقاق المخبوز بسمن, ولو بتحبوا تحمروا الخبز ممكن تحمصوه فى الفرن بمعلقة زيت او تستغنوا عن الزيت, ونستخدم شوربة منزوعة الدهن على أد ما نقدر, ونستخدم الأرز المسلوق على طريقتنا, ونحمر الثوم فى معلقة زيت صغيرة ونحط معلقة خل وناكل احلى فتة دايت.
5- اللحم والدجاج والسمك بنسلقهم او نشويهم وبنختار الأجزاء الخالية من الدهن الظاهر, وطبعا ممنوع القلى والتحمير, لكن ممكن بعد السلق ندخله الفرن يحمر او اضعف الإيمان نمحه بمعلقة زيت وندخله الفرن يحمر.

ليست هناك تعليقات:

إرسال تعليق

لا تنسى ابدا ذكر الله

sultan.org free islamic books

Copyright Text

Sponsor

اسهل و اوفر و اسرع طريقة لاشهار موقعك
Search Engine Submission - AddMe hitstatus