الخميس، 2 ديسمبر 2010

آآآآآآآآآآآآآآآآآآآآآآه من الندم

الندم وما أدراك ما الندم
احساس فظيع
بتحس ان فى نار جواك , نار مش عارف تطفيها ازاى لأن خلاص الفاس وقعت فى الراس.
ومع الندم احاسيس تانية كتير, مش عارفة هى مصاحبة ليه ولا جزء من تكوينه, ولا هما احساس واحد له اكتر من اسم.
مع الندم بتحس بالذنب والدونية والضعف وانعدام الارادة وانك ولا حاجة وبتبقى مكسوف من نفسك قوى ومش قادر تبص لنفسك فى المراية.
بتبقى عايز تستخبى وماتشوفش حد ولاحد يشوفك وبتحاول بكل ما اوتيت من قوة انك تخبى الى حصل وماحدش يعرف عنه حاجة عشان نظرة الناس ليك ماتتغيرش زى مانظرتك لنفسك اتغيرت.
اكيد انتم فاهمين وحاسين بالى انا بقوله لأن مافيش حد فينا ماجربش الاحساس ده قبل كده, وكلنا لنا أخطائنا الى بنندم عليها وبنتمنى مانكررها تانى.
الندم كاحساس مؤلم لكنه مفيد لأنه بيدل على اننا لسة فينا خير,واننا هنحاول نصحح مسارنا ونترك الأخطاء والصفات السيئة الى بنحس بعدها بالندم.
لكن فى بعض الحالات بتكون أخطائنا وصفاتنا السيئة دى اقوى مننا ومش بنقدر نتغلب عليها بسهولة, ونفضل نكررها ونحس بعدها بالندم ,ونتعذب ونعانى من شعورنا بالنقص والضعف, ويمكن بعد فترة خلاص نبطل نحس بالندم ويبقى الموضوع عادى ونلاقى الخطأ او العادة السيئة دى بقت جزء من حياتنا , شىء عادى جدا بنعمله كل يوم من غير أى مشكلة ولا احساس بذنب او ندم.
هنا بقى تبدء المشكلة الحقيقية, لأننا لو وصلنا للمرحلة دى مش هنفكر أصلا اننا نتغلب على أخطائنا وعاداتنا السيئة وهتبقى جزء مننا ويزيد ويستمر اثرها السلبى علينا وعلى الى حوالينا.
يمكن بتسألوا ايه دخل الكلام ده فى موضوع المدونة الى هو طبعا الرجيم
أقولكم
الندم ده شعور كل اصحاب الوزن الزائد بيحسوه مش يوميا , لأ ده اكتر من مرة فى اليوم حسب عدد مرات الأكل كل يوم.
قبل الأكل بيكون كل تفكيرى انى جعاااااااااااااااااااااانة.
مش فاكرة الرجيم
مش فاكرة صحتى
مش فاكرة شكلى
مش فاكرة لبسى
مش فاكرة زوجى
مش فاكرة المشاكل الكتير الى بيسببهالى وزنى
مش فاكرة أى حاجة غير انى عايزة آكل
كأن فى قوة شريرة مستحوزة عليا زى مابيقولوا فى الأفلام الأجنبى
أجرى على المطبخ وافتح التلاجة واطلع كل الى يقابلنى ,دى حتى ساعات بتكون حاجات ما تنفعش مع بعضها خالص, كأن كل حاجة وجبة قائمة بذاتها وانا باكل وجبتين تلاتة فى نفس الوقت, وافضل آكل وآكل ومش قادرة اوقف, وحتى لما اوصل لاحساس اولى بالشبع ممكن اتوقف عنده عن الأكل بكون خلاص بوظت الدنيا وماعادتش فارقة واكمل بقى للآخر ,أو بمعنى تانى اكمل لحد ماحس بالانفجار.
بعد الأكل ابتدى افكر ايه الى انا عملته ده؟؟؟؟؟؟؟؟؟؟؟؟؟؟؟؟
كأنى كنت منومة مغناطيسيا وصحيت فجأة , مش عارفة انا عملت كده ازاى, مش عارفة عقلى كان فين, مش عارفة كل مشاكلى الى هتموتنى والى السبب فيها تخنى غابت عن بالى ازاى, مش عارفة ميعاد دكتورة التغذية الى كمان كام يوم ما افتكرتهوش ازاى, مش عارفة نظرة زوجى الى بتدبحنى راحت عن بالى ازاى, مش عارفة تعبى فى الجم وجرى من الدكتور ده للدكتور ده عشان اعالج تكيس المبايض والضغط ووجع ظهرى ورجلى وغيره وغيره , وكل دكتور يقولى خسى , مش عارفة ده كله كان فين وانا باكل كأنى ..................., بس هقولكم كأنى ايه.
كل الأفكار دى بتجننى , واحساسى بالندم بيقتلنى, بس خلاص بإيه يفيد الندم.
افضل على الحال ده لحد ما اجوع تانى , وبعدين تبدء الحرب النفسية بينى وبين نفسى, أو بين معدتى وبين عقلى, كتييييييييييييييير معدتى هى الى بتكسب الحرب بس ساعات برده عقلى بيتغلب عليها.
صحيح مش دايما عقلى هو الى بيكسب الحرب ويخلينى أقدر اسيطر على رغبتى فى الأكل, لكن المرات القليلة دى بتدينى أمل إنى ممكن فى يوم أقدر أنظم حياتى , ومرات انتصار العقل تزيد لحد ما يتغلب نهائيا وتنتهى الحرب خالص , الى بعمله دلوقتى كل فين وفين وبطلوع الروح يجى عليه الوقت الى يكون فيه عادة واسلوب حياة زى مابيقولوا.
لحد ما الوقت ده يجى هيفضل الصراع بين عقلى ومعدتى مستمر,
وربنا يستر.

هناك 8 تعليقات:

  1. ايه يابنتى انتى كلامك كله تشاؤم وندم ونكد بصراحة انا صعبان عليا جوزك وبقول الله يكون في عونه مستحمل النفسية دى والعقلية دى والجسم دة عيشي حياتك كلي واتمتعي وبصي للدنيا بمنظور تانى ظز ف كووووووول حاجة تضايق الواحد كبري وكلي مرة نعمل رجيم مرة نفشل واهو تغيير .

    ردحذف
  2. لا لا لا
    ده انت شركتنى خالص نفسيا وعقليا وجسمانيا
    على فكرة الحاجات دى مش بتطلع لجوزى يعنى تقريبا هو الوحيد فى الدنيا الى مايعرفش حاجة عن كل الكلام الى بكتبه فى المدونة,
    انا قدامه كوووووووووووووووووووول
    ومكبرة لدرجة تفرس وتعصب وتنرفز
    يعنى ماتخافش عليه ابدا.

    ردحذف
  3. وبعدين العمل ايه ياكبيره ؟؟؟؟

    ردحذف
  4. ماهو لو كنت عارفة العمل ماكانش ده بقى حالى
    ولا ايييييييييييييييه؟؟؟؟؟؟؟؟؟؟؟؟؟؟

    ردحذف
  5. ده اللى بمر بيه زيك بالظبط

    وكأنك بتتكلمى عنى

    أنا وصلت لمرحله انى مبقتش بحب اخرج من كتر منا حاسه

    انى تخينه واللبس بقى ضيق وشكلى بقى وحش

    وعندى برده مليون مشكله ومشكله بسبب زياده الوزن دى

    وكل ما اروح لدكتور يقولى خسى

    ولا عارفه أخس و اى علاج باخده مبيعملش نتيجه لانى محتاجه أخس

    وبدون ما اخس اى أمراض عندى مش هتروح

    وقريت كذا موضوع ليكى والمدونه رائعه

    و كمان لقيت هنا المكان اللى أفضفض فيه عن الموضوع ده اللى بصحى وأنام

    وهو جايبلى اكتئاب

    أرق تحياتى
    Rosittanita

    ردحذف
  6. والله يا روزي أنا بطلت اروح لدكاترة او ادور على دوا لأى حاجة لأنى متأكدة ان الحل الوحيد انى أخس ولأنى خلاص ما عنتش اقدر استحمل تانيب الدكاترة وتانيب زوجى لما نروح للدكاترة
    ربنا يساعدنااننا نخس ان شاء الله
    والمدونة مفتوحة لك فى اى وقت تتكلمى زى ما انت عايزة وتفضفضى زى ما انت عايزة واكيد هتلاقى الى يسمعك ويحس بيك ويقدر مشاعرك

    ردحذف
  7. أزال المؤلف هذا التعليق.

    ردحذف
  8. أنا لسه شايفه تعليقك

    عدى وقت طوييييييييييل
    شوفت مدونتك للمره التانيه بالصدفه عشان أدخل على موضوع الاقى فيه تعليقى وردك عليه
    ببعتلك وأنا فى قمه يأسى
    حاسه ان الحياه متقفله ،حاسه انى فقدت كل معنى للحياه
    مابقيتش عايزه أخرج ولا أقابل حد ولا اشوف حد
    مابقيتش حاجه بتفرحنى
    وما اتجوزتش وشكلى مش هتجوز خالص
    موضوع التخن بقى مسيطر على حياتى
    بخرج مع صاحبتى اللى قدى وبحس جنبها انى مامتها مش صاحبتها
    بتمنى تشوفى كلامى لأنى فعلا هموت والاقى حد اتكلم معاه ويكون فاهم وحاسس بالسواااااااد اللى انا حاساه ده

    ردحذف

لا تنسى ابدا ذكر الله

sultan.org free islamic books

Copyright Text

Sponsor

اسهل و اوفر و اسرع طريقة لاشهار موقعك
Search Engine Submission - AddMe hitstatus