{ عايزة اخس }

طبعا من الصعب جدا انك تقول لمراتك انها تخنت ده يعنى لو بتحبها وخايف على احساسها يعنى ولأنك لازم تقولها ولأنك لزم تحافظ على شعورها بتبدء تلمح من بعيد وتدور على كلام ما يجرحش وعشان نساعدك فى المهمة دى اتفرج على الفيديو ده

طبعا عنوان غريب جدا خصوصا على زوجة مصرية عربية اول مقوم من مقوماتها انها لازم تكون طباخة ماهرة وإلا تكون معرضة ان زوجها يتزوج عليها فى اى لحظة. من اكبر العوائق الى بواجهها لما اعمل رجيم انى بعرف اطبخ كويس , واكلى بيكون حلو جدا فى معظم الأحيان, ده ما يمنعش طبعا ان الأكل يشيط مرة ولا يطلع وحش مرتين لكن القاعدة العامة انى طباخة ماهرة. اى اكل اعمله مهما يكون بسيط او اى كلام يطلع طعمه جنان ولا يقاوم من أول الكشرى والباذنجان والبطاطس, مرورا بالخضروات والأرز واللحم , وصولا الى المحاشى والبشاميل والمقلوبة والبريانى , وطبعا ما اقدرش اقول لكم على الفتة بالخل والثوم. اخر مرة عملت قرنبيط مقلى من كام يوم كان جميل لدرجة انك ما تقدرش تبطل اكل وتقوم غير لما يخلص, قعدت اقول لنفسى انا ايه الى خلانى اطبخ القرنبيط ده وانا عارفة انى بحبه, وما تقولوش انا بشكر فى نفسى او انه مش معقول حلو للدرجة دى وانى باكل وخلاص لأن اختى الرشيقة يومها قعدت تاكل لحد ما قالت بطنى وجعتنى وهو مجرد قرنبيط مقلى لا هو محمر ولا مشمر ولا طواجن ولا محاشى. كل يوم اطبخ حاجة واقول انا هاكل النهاردة وابدء الرجيم من بكرة , ويجى بكرة ا...

من أكتر الحاجات الى بتضايقنى وبتحرق دمى وبتحسسنى باحساس سىء جدا صورة اصحاب الوزن الزائد فى الأفلام , والى بيضايقنى اكتر ان الى بيجسد الصورة دى وبيثبتها فى عقول المشاهدين هما اصحاب الوزن الزائد نفسهم فى معظم الأحوال,مش عارفة هما بيقبلوا يعملوا فى نفسهم كده ازاى , ولا هما مش بيشوفوا نفسهم بعد كده ولا نظرات الاستهزاء فى عيون الناس وضحكهم عليهم, وما تقولوش الناس بتضحك على الشخصية , لأنهم بيضحكوا من وزن الى قدامهم وشكله ولبسه , ودى فعلا شخصية الممثل الحقيقة مش تمثيل ولو فى جزء كبير منها. طبعا كلكم عارفين انا بتكلم عن  ايه! بنشوف الشخصية الى وزنها زايد فى الفيلم كل دورها ان الباقيين يتريقوا عليها , شخصية ساذجة ,عبيطة, جاهلة, غبية, لا تفهم شىء عن العالم ولا تعمل شىء ولا تبحث عن شىء غير الأكل وبس, وده طبعا غير التحابيش الى تخلى المشاهد يضحك ضحكتين زيادة او يتعاطف مع البطل او البطلة الى ياعينى مغصوب يتجوز التخينة دى , او التخين ده الى هيموت عليه وبيحبها وبيطاردها فى كل مكان. التحابيش دى تشمل طبعا الأرض الى بتتهز لما يمشى والكراسى والسراير الى بتتكسر لما يقعد , والناس الى بيقع فوقهم او بي...

مش عارفة ليه دايما مش بندور على حل لمشاكلنا غير فى آخر لحظة, لما يكون خلاص ما ينفعش حل أصلا, أو على أقل تقدير الوقت لا يكفى لتطبيق الحل على الوجه الأمثل. طيب كنا فين من زمان, المشكلة اكيد ما ظهرتش فجأة, والحل كمان فى معظم الأحيان بيكون موجود قدامنا ومش شايفينه أو مش عايزين نشوفه أو حاسين إنه صعب وبندور على غيره , مع اننا متأكدين إنه الحل الوحيد كالعادة, لكن بنحاول نتهرب من تنفيذه ونأجله بحجة البحث عن حل اسهل او احسن, ونفضل نلف وندور لحد ما نلاقى المشكلة اتعقدت , أو نوصل للحظة الى لازم نحل فيها المشكلة بس بيكون خلاص فات الميعاد. مش فاهمين حاجة أفهمكم وطبعا المشكلة هنا هى مشكلة زيادة الوزن, مشكلتى الأزلية, مثلا انا شفت مرة مسلسل أجنبى بيحكى عن دكتورين تجميل , بتيجى لهم مريضة وزنها زايد جدا, ادى كده أو يمكن أكتر شوية,المريضة دى عايزة تعمل عمليات تجميل كتييييييييييييرة,اهمها شفط الدهون من جسمها كله, وتجميل بعض الحاجات فى وجهها كمان, ومستعجلة جدا وعايزة تخلص بسرعة لأنها عايزة تروح حفلة لم الشمل فى مدرستها القديمة وشكلها متغير تماما , وعايزة تبهر زمايلها القدام وكل الى كانوا بيسخروا من ...

الندم وما أدراك ما الندم احساس فظيع بتحس ان فى نار جواك , نار مش عارف تطفيها ازاى لأن خلاص الفاس وقعت فى الراس. ومع الندم احاسيس تانية كتير, مش عارفة هى مصاحبة ليه ولا جزء من تكوينه, ولا هما احساس واحد له اكتر من اسم. مع الندم بتحس بالذنب والدونية والضعف وانعدام الارادة وانك ولا حاجة وبتبقى مكسوف من نفسك قوى ومش قادر تبص لنفسك فى المراية. بتبقى عايز تستخبى وماتشوفش حد ولاحد يشوفك وبتحاول بكل ما اوتيت من قوة انك تخبى الى حصل وماحدش يعرف عنه حاجة عشان نظرة الناس ليك ماتتغيرش زى مانظرتك لنفسك اتغيرت. اكيد انتم فاهمين وحاسين بالى انا بقوله لأن مافيش حد فينا ماجربش الاحساس ده قبل كده, وكلنا لنا أخطائنا الى بنندم عليها وبنتمنى مانكررها تانى. الندم كاحساس مؤلم لكنه مفيد لأنه بيدل على اننا لسة فينا خير,واننا هنحاول نصحح مسارنا ونترك الأخطاء والصفات السيئة الى بنحس بعدها بالندم. لكن فى بعض الحالات بتكون أخطائنا وصفاتنا السيئة دى اقوى مننا ومش بنقدر نتغلب عليها بسهولة, ونفضل نكررها ونحس بعدها بالندم ,ونتعذب ونعانى من شعورنا بالنقص والضعف, ويمكن بعد فترة خلاص نبطل نحس بالندم ويبقى الموضو...

قال ايه اتجوز عروسة صينية استهلاكها قليل لصغر معدتها. خلاص اعلنوا الحرب علينا ولازم نتخذ خطوات رسمية قبل ما تقع الفاس فى الراس والإعلان يبقى حقيقة وعيان ونلاقى الرجالة اتجوزوا الصينية صغيرة الحجم قليلة الإستهلاك سهلة التخزين الحقوا نفسكم انا حزرتكم وقلت لكم واسيبكم مع الفيديوا بقى وامشى بسرعة ايوة ياحلوين اروح الحق نفسى انا كمان

طول عمرى نفسى احس انى خفيفة,ريشة طايرة فى الهوا.وكتير بحلم وانا نايمة انى فعلا طايرة فى الهوا, زى ما بحلم كتير برده ان فى ناس بتقولى انت جسمك جميل, او الهدوم جميلة عليك,او حتى ده انت لو خسيتى بس شوية صغيرين هتبقى مانيكان, مش بيقولوا الجعان بيحلم بسوق العيش. وانا فى التعليم كنت بركب المواصلات انا وزميلاتى, وطبعا كنا كتير ما نلاقيش مكان كفاية لينا كلنا فممكن واحدة تاخد زميلتها على رجلها وطبعا كنت انا الى اخد زميلتى على رجلى, اصل يبقى حرام عليا لو حاجة غير كده حصلت. بس فى مرتين الموازين اتقلبت. مرة كنت مسافرة انا وماما رايحين البلد ,وما فيش مواصلات نهائى وبعد عناء لقينا عربية بس ما فيش غير مكان واحد بس,وطبعا ما كانش ينفع غير انى اقعد على رجل ماما, وطول السكة مشفقة عليها وزعلانة ونفسى الأرض تنشق وتبلعنى وتريحها من حملها التقيل وقاعدة كده على طرف رجلها ورافعة نفسى لفوق على اد ما اقدر عشان مااظلمهاش اكتر من كده, بس بردة مهما اعمل فانا قاعدة على رجلها وهى شايلانى وما ادراكم بمعنى ان حد يشيلنى , كان الله فى عونها. صحيح صعب قوى ان مامتى تاخدنى على رجلها , بس على الأقل هى مامتى تستحملنى, ا...

بما ان البحث عن المتعة هو السبب الأساسى لمشكلة المشاكل الى بعانى منها وهى الوزن الزايد, فالبحث عن حاجة تسد النفس والعثور عليها هو الحل الوحيد للمشكلة. حاولت كتير ادور على حاجة تسد نفسى واتبعت كل الوصفات الى سمعتها. بدءت بخل التفاح طبعا كل التخان عارفين ريحته وطعمه وعارفين المعاناة الفظيعة فى شرب معلقة خل تفاح على نص كوب ماء على الريق وقبل الأكل لكن مافيش فايدة لا نفسى انسدت ولا خسيت,بالرغم من ان ناس كتيييييييييير بتشكر فيه وبتحكى على نتايجه الجميلة فى التخسيس. وانا فى تالتة ثانوى تابعت مع دكتورة رجيم وكتبت لى فى الرجيم واحدة جريب فروت على الريق كل يوم ,بس المشكلة ان كل حاجة بتسد النفس فعلا طعمها يسد النفس فما كنتش بقدر اكلها, ولو جيت على نفسى واكلتها بكون عايزة اكل اى حاجة بعدها عشان اتخلص من طعمها,فبدل ما تسد نفسى كانت بتفتحها فقلت الطيب احسن وبطلت اكل الجريب فروت. وفى مشوار البحث عن حاجة تسد النفس جربت الإبر الصينية بس اعتقد ان حكاية انها بتسد النفس ده مالوش اى اساس من الصحة ,لأننى خسيت آه بس لأنى ماكنتش باكل, وما كنتش باكل آه لكن كنت جعانة ومش باكل غصب عنى. وفى فترة من فترات ...

اعتقد انها مش فكرتى لوحدى وانما هى فكرة كل دبدوبة جميلة وكل قلبوظة مسمسمة وخصوصا المتزوجات انها الفكرة الى موديانا كلنا فى داهية وجايبانا ورا ومبوظة رجيماتنا فكرتى او بالاحرى فكرتنااااااااااااا عن الاسترخاء بالليل لما الدنيا تظلم والعيال والراجل يناموا ومايبقاش فى شغل بيت ولا اسكت ياواد ولا اقعدى يابت نطلع تعب اليوم كله وارهاق اليوم كله وساعات عكننة ونرفزة وحرقة دم اليوم كله وندفن ده كله فى ايييييييييييييييييييييييييييييييييييه مش فى التراب كما جرت العادة فى الدفن لا فى الاكللللللللللللللللللللللللللللللللللل نقعد على الكنبة ونشغل التليفزيون وقبل ده كله نعمل غارة على التلاجة والمطبخ واى مكان بتعينى فيه الاكل نتعشى لو ما كناش اتعشينا وان كنا يبقى زيادة الخير خيرين ونجيب بقى الشاى والحلويات والمسليات والى يعنى كده تجيب الفاكهة بس مش اى فاكهة كل الفاكهة الى فى البيت ونقعد نقلب فى التليفزيون وننقنق على مهلنا يمكن ساعات للفجر وقال ايه بنسترخى وللحديث بقية ربما فى ساعة الاسترخاء

هى فكرة خطرت فى دماغى او ممكن تقولوا احساس حسيته بعدين فكرت فى معناه او سببه او حتى علاجه ولان الاحساس والفكرة لهم علاقة بالاكل او بمعنى اصح بعدم قدرة على مقاومة الاكل كتبت الموضوع هنا المهم طبعا بتسألوا ايه هو الاحساس الى جاب لكم وجع الدماغ ده كله الموضوع بيتلخص فى كلمة واحدة المتعة ايوة المتعة الاحساس الجميل الى بنحسه لما ناكل اكلة جميلة بنحبها بس مش هى دى المشكلة المشكلة فى حالتى انى لما باكل اكلة حلوة الاحساس ده بيسيطر عليا بفضل اكل واكل حتى وانا شبعانةعشان اتمسك بالاحساس ده لاطول فترة ممكنة يمكن الحالة دى تكون مفهومة ده طبعا بغض النظر عن انها خاطئة لكن الى مش مفهوم لما اكل اكل عادى او حتى مش مستطعماه وبالرغم من كده باكل واكل واكل كأنى بدور على شىء مستنياه يجى وعندى امل انى لو استمريت ممكن احس احساس المتعة ده وساعات اكل اكلة وتعجبنى وارجع اعملها تانى بس ما تكونش كويسة زى اول مرة وارجع اعملها تالت ورابع ومليون وبرده ما بتكونش زى اول مرة وبالرغم من كده ما بقدرش اقاوم الفكرة انى لو اكلتها هحس بالمتعة دى مع ان ده ما بحصلش او يمكن نادر انه يحصل انا من كتر ما قري...

زوجى له واحد زميله كان ماشاء الله وزنه 148 كيلوا وفضل حوالى سنتين ماشافهوش ومن كام يوم لقى واحد بيسلم عليه وبيكلمه وهو مش عارف ده مين بعد مامشى بيسألواحد زميله كان واقف معاه وبيقوله هوده مين؟ قاله مش عارفه ازاى ده فلان؟ طبعا زوجى ما صدقش قاله ازاى ده فلان انت متأكد هو ازاى بقى كده زميله الى ماعرفوش ده كان وزنه زى ما قلت لكم 148 ودلوقتى بقى وزنه 70 كيلوا وشكله اتغير 100% لدرجة ان زوجى ماعرفوش فعلا ولأن زوجى مشغول قوى بالرجيم ونزول الوزن طبعا بسببى ونفسه يلاقى طريقة عشان اخس انا كمان ولأن زميله ده ما شاء الله كان وشه كويس ونضر فكان زوجى متاكد انه ماعندوش السكر ولا أى مرض يسبب فقدان الوزن طبعا انا اول جوزى ما قالى قعدت استعبط واقوله اكيد عمل عملية فى المعدة وتوهت فى الكلام جوزى طبعا سأل واح قريب من زميله ده قاله ايه بقى زميله خس كده بالرجيم والمشى وحتى ماكانش بيتابع مع دكتور اول 6 شهور كان بيفطر الصبح زبادى زينزل شغله وهو طبيعة شغله ممكن يفضل فيه من الصبح لحد بالليل وطول النهار مديها قهوة وسجاير ويروح يتعشى سلطة ولحمة او فراخ يعنى مانع الدهون والنشويات والسكريات نهائى وفى ظرف سنة او اكتر...

 طبعا لو ما عملناش رجيم هنزيد ومش هيبقى فيه لا صحة ولا رشاقة ولا شياكة بس فى مواضيع كتير عن الرجيم فى الى نعرفه من بعيد لبعيد وفى الى جربناه ونجح او فشل والى الناس عمال على بطال بتنصحنا بيه بس ما فيش مكان غير المدونة نقدر نقول فيه انا تعبت وقرفت من الرجيم انا بحب الاكل والرجيم وكلامكم دمر اعصابى ونفسيتى من غير ما حد يبص لنا بصة كده ولا كده تكرهنا فى نفسنا شوية زيادة احنا هدفنا هنا نساعد بعضنا على تقبل شكلنا ووزننا والاهم من كده تقبل فكرة اننا ممكن ننزل وزننا وان ده مش مستحيل وفى نفس الوقت مش بالسهولة الى كل الى حوالينا متصورينها انا فى رايى ان الضغط النفسى الى بنعانى منه هو اكبر العوائق الى بتمنعنا اننا نخس وكمان احباط الى حوالينا لينا سواء بانهم يشوفوا ان كل الى بنعمله مش كفاية واننا بندلع وان الموضوع سهل واننا مكبرينه ومطنشين او بانهم يقنعونا انه مستحيل وصعب احنا هنا كلنا بنعانى نفس المشكلة وعارفين انه شىء صعب لكن مش مستحيل واننا محتاجين الى يشجعنا من غير ما يضغط علينا والى يفهمنا وما يسخرش منا لما نفشل او نزهق او نتعب احنا محتاجين لمكان للفضفضة والدعم اكتر بكتير من احتياج...

  فى النادى الى بروحه مدربتين واحدة تقولى انت بتلعبى زيادة عن اللزوم جسمك مش هيتحمل وكل يوم تسألنى لعبتى اد ايه النهارده وانا اتغاظ منها قوى والتانية تقولى اسرع اقوى اتحدى نفسك شدى على نفسك شوية كا ما تتعبى افتكرى هدفك وبرده اتغاظ منها قوى امبارح رجعت اكلم نفسى تانى قعدت اقول لا دى عجبانى ولا دى عجبانى امال انا عايزة ايه؟ اقولكم انا عايزة ايه انا عايزة حد يقولى ممتاز الى انت بتعمليه ده كويس قوى لو تقدرى على اكتر يبقى احسن بس كده كويس قوى بالنسبة للى فى وزنك وان شاء الله لما تخسى شوية هتقدرى تزودى عن كده انا بعمل كل الى بقدر عليه والله بجيب اخرى ساعات بيبقى مش كفاية انا عارفة بس والله مش بقدر على اكتر

النهارده عايزة اقولكم على حصة السويدى فى الجم انا كل ما اروح حصة السويدى الاقى كل الى هناك رفيعين جدا ولا عارضات الازياء والى مش كده تكون مثلا عندها دهون زيادة فى منطقة معينة عاوزة بطنها تنزل شوية ولا عايزة حاجات تانية انتم اكيد عارفينها تكش شويتين حتى اتخن واحدة فيهم حلم حياتى دلوقتى انى ابقى زيها وطبعا احنا بنلعب وامامنا مرايات يعنى انا شايفاهم كلهم وهم كمان شايفينى بس انا بحاول ادارى ورا ولا فى المكان الى ما فيهوش مراية اصل الموضوع مش ناقص فضايح المهم بقى ان تمرينات السويدى دى صعبة جدا وطبعا انا مش بقدر اعمل كل التمرينات او اكمل العدد الى بيعملوه لكل تمرين واقعد ابص لنفسى وابص للبنات واكلم نفسى الاقينى مش قادرة اعمل زيهم اقول كويس انى قادرة اعمل اى حاجة يعنى مش شايفة هما اد ايه وانت اد ايه دا انت اد تلاتة منهم وارجع اقول لنفسى هو فيه حد ادك اصلا هو فيه حد عمل فى نفسه زى ما انت عملت فى نفسك هو فيه حد يسيب نفسه لحد ما يوصل لكده وطول حصة السويدى وانا بكلم فى نفسى شكلى اتجننت مش كده

انا بحاول اقلل اكلى لكن مش قادرة امشى على رجيم ما هو انا لو ابطل شوية مع التعب الى بتعبه فى الجم كنت سويت الهوايل بس مش قادرة ببقى جعانة قوى واحس انى مهما اكل مش بشبع كأن معدتى بير ما لوش قرار والله انا زهقت من نفسى انا فعلا ساعات بكره نفسى واقعد اقول ايه الضعف ده يعنى انا مش قادرة اقعد جعانة شوية طيب بلاش جعانة اكل نص بطن لا لما ابقى عايزة اكل ابقى زى المجنونة مش حاسة غير بالجوع وما بفكرش غير فى الاكل والله احساس صعب قوى مهما قلت مش هقدر اوصفه وما حدش يقدر يفهمه غير الى حس بيه انا ساعات بفكر لنه عامل زى الادمان لا ده فعلا اكيد ادمان

شوفوا انا زعلانة ونفسى مسدودة وخايفة اد ايه وشوفوا بقى لما اكون فى الجم وتعبانة موت وحيلى مهدود وقاعدة افكر ان ده برده مش كفاية وانى لازم ابطل اكل شوية والاقى واحدة جنبى عروسة جديدة وجسمها حلو خالص وقاعدة تقول انا جوزى عايزنى اتخن وبيقولى انا عارف انك عايزة تروحى الجم عشان تخسى اوعى انا هوزنك وبتقول على طول يقولى كلى ويجيب لى شيكولاتة وشيبسى ومكسرات وانا بقة مفروسة جنبها لحد ما خفت عليها لا احسدها ويجرى لها حاجة

انا ما كنتش حاسة بمشكلة التخن ده قبل الجواز ربع ما انا حاسة بيها دلوقتى كل ما جوزى يبصلى بصة من بتوعه ابقى نفسى اولع فى نفس وارتاح واريحه وكنت بكدب احساسى واقول الراجل ما غلطش وما قالش حاجة وانت عاملة زى الى على راسه بطحة وبيحسس عليها مع ان حياتنا كلها مشاكل من غير سبب وزعل ونرفزة لحد ما فى يوم سألته انت عاجبك حياتنا كده قال لا قلتله طيب ليه بتعاملنى كده وكانت الصاعقة والمستخبى بان اتاريه معبى وساكت قالها كده بكل صراحة كل الى بيحصل ده بسبب انى ما بسمعش الكلام ومطنشة ومش فى دماغى ومش عايزة اخس مع انى والله ما فى شىء فى تفكيرى 24 ساعة كل يوم من كل اسبوع وكل شهر فى كل سنين عمرى غير انى اخس بس مش عارفة ازاى وما كنتش بقوله عشان لو قلت عايزة اخس وانا وزنى اصلا بيزيد ده طبعا اكبر اعتراف بالفشل والدونية والضعف مش الطناش احسن برده

 انا جوزى كان دايما يقول لى لو كنت خسيت 5 كيلوا فى السنة مش فى الشهر كان زمانك خسيت دلوقتى 30 كيلوا ده على اساس انى متزوجة من 6 سنوات بس انا طبعا عميدة الفاشلين فى الرجيم بدليل انى قعدت حوالى 4 شهور اخس فى 7 كيلوا انقص كيلوا وازيد اتنين وما رحمنيش ولا ساعدنى غير الرياضة اشتركت فى الجم وبقيت اروح تقريبا 6 ايام فى الاسبوع العب لحد ما حيلى يتهد وابقى مش قادرة اتحرك وده طبعا لانى مش قادرة اتحكم فى موضوع الاكل كويس بس برده انا ماعدتش اكل زى الاول ولا نص الاول حتى بلخبط آه ويوم بيبقى كويس واتنين لأ بس لحد دلوقتى الرياضة مساعدانى لكن انا متأكدة ان ده مش هيستمر كتير وهضطر اعمل رجيم غصب عنى

تعرفوا انا امبارح وانا فى الجم سمعت اغنية اجنبية تقولوا انا لى كتباها او الى كتبها كتبها مخصوص للمدونة لو كنت اعرفه كنت اديته عضوية شرفية هحاول افتكر كلماتها لا تخبرنى برجيم او تقل خد حبة دعنى بسلام آكل الايس كريم يعجبنى وزنى كما هو انا سعيد لأنى سمين وان كنت لا اعجبك فلتغرب عن وجهى طبعا مش هنضحك على بعض واقول انى سعيدة علشان تخينة انا نفسى اخس بس مش عايزة كل الى يشوفنى يقولى على نوع رجيم مش عايزة الناس تشوفنى تخينة وبس ولا تعاملنى على انى تخينة وبس ولا توصفنى على انى تخينة وبس انا تخينة آه فعلا لكن انا انسانة جميلة متعلمة مثقفة بحب الناس وبحب الدنيا عندى عيوب كتير مش اسوءها انى تخينة وعندى مميزات اكتر عمر ما هيكون احسنها انى رشيقة انا زوجة انا ام انا بنت انا اخت انا صديقة انا حبيبة انا مش تخينة وبس ومش هسمح لاى حد يعاملنى على انى تخينة وبس ومش هسيبكم تشوهوا صورتى قدام نفسى ولما ابص فى المراية اشوف واحدة تخينة وبس

على فكرة يا جماعة انا مش فاشلة قوى انا حتى خسيت17 كيلوا بس لازم اخس كمان30 كيلوا على اقل تقدير المهم انى خسيت لما مارست الرياضة وطبعا قللت اكلى كتير انا كنت وصلت لدرجة انى تقريبا مش ببطل اكل لكن مش قادرة اعمل رجيم اكل الرجيم كنوعية هو ده اكلى الطبيعى انا مش باكل وجبات جاهزة مش بستعمل سمنة فى الطبيخ مش بحمر الاكل عادة مسلوق الخضار نى فى نى او لو عملت دمعة بتكون خفيفة بزيت نباتى قليل بستعمل سكر رجيم الحلويات نادرا ما اتناولها المحاشى والاكلات السمينة والصوانى كل فين وفين الفاكهة والخضار عنصر مهم جدا فى النظام اليومى بس المشكلة فى الكميات ساعات بحس ان معدتى مخروقة مهما اكل ما بشبعش حتى ان شبعت وكنت خلاص مش قادرة هما ساعتين تلاتة بالكتير وكأنى ما اكلتش شىء