الأربعاء، 3 نوفمبر 2010

البحث عن المتعة المفقودة

هى فكرة خطرت فى دماغى
او ممكن تقولوا احساس حسيته
بعدين فكرت فى معناه او سببه او حتى علاجه
ولان الاحساس والفكرة لهم علاقة بالاكل
او بمعنى اصح بعدم قدرة على مقاومة الاكل
كتبت الموضوع هنا
المهم طبعا بتسألوا ايه هو الاحساس الى جاب لكم وجع الدماغ ده كله
الموضوع بيتلخص فى كلمة واحدة
المتعة
ايوة المتعة
الاحساس الجميل الى بنحسه لما ناكل اكلة جميلة بنحبها
بس مش هى دى المشكلة
المشكلة فى حالتى انى لما باكل اكلة حلوة الاحساس ده بيسيطر عليا
بفضل اكل واكل حتى وانا شبعانةعشان اتمسك بالاحساس ده لاطول فترة ممكنة
يمكن الحالة دى تكون مفهومة ده طبعا بغض النظر عن انها خاطئة
لكن الى مش مفهوم لما اكل اكل عادى او حتى مش مستطعماه
وبالرغم من كده باكل واكل واكل
كأنى بدور على شىء مستنياه يجى
وعندى امل انى لو استمريت ممكن احس احساس المتعة ده
وساعات اكل اكلة وتعجبنى وارجع اعملها تانى
بس ما تكونش كويسة زى اول مرة
وارجع اعملها تالت ورابع ومليون
وبرده ما بتكونش زى اول مرة
وبالرغم من كده ما بقدرش اقاوم الفكرة انى لو اكلتها هحس بالمتعة دى
مع ان ده ما بحصلش او يمكن نادر انه يحصل
انا من كتر ما قريت عن الاكل النفسى
او ان الواحد بياكل عشان يعوض شىء مفتقده فى حياته
بقيت افكر انى بدور على المتعة فى الاكل لانى مفتقدة المتعة فى اى شىء تانى
بعمل الى انا عايزاه فى الاكل لانى ما بقدرش اعمل الى انا عايزاه فى مكان تانى بسيب نفسى على راحتها فى الاكل
لانى باجى عليها فى كل شىء تانى
وخصوصا فى معاملتى مع الى حواليا
بسيب نفسى على راحتها فى الاكل
لانى حاسة بالقيود بتخنقنى فى كل شىء تانى
مع ان تخنى من اكبر القيود الى بتخنقنى
وبتدى فرصة لناس تانية تتحكم فية وتخنقنى
باكل من غير عقل ولا تفكير
لانى تعبت من العقل والتفكيرالى بحكمهم فى حياتى عشان تمشى
هتقولوا انى بدور على اى حجة اعلق عليها فشلى فى انى اكون رشييقة
انا فعلا بدور على حجة او سببب
مش عشان اعلق عليها فشلى
لا
عشان احاول افهم ايه الى انا بعمله فى نفسى ده
يمكن لو فهمت اقدر اتغلب على المشكلة.

هناك تعليق واحد:

  1. فعلاجبتي المشكلة ماشاء الله عليكي
    ودي بدايةالعلاج الصح ربنا يبارك فيكي

    ردحذف

لا تنسى ابدا ذكر الله

sultan.org free islamic books

Copyright Text

Sponsor

اسهل و اوفر و اسرع طريقة لاشهار موقعك
Search Engine Submission - AddMe hitstatus